Սիրիահայ ընտանիքին ծեծի ենթարկելու գործով 9 հոգու մեղադրանք է առաջադրվել

Մոտ մեկ ամիս առաջ yerkir.am-ն անդրադարձել էր 2013 թ. դեկտեմբերի 27-ին սիրիահայ Բրուտյանների ընտանիքի անդամներին ծեծի ենթարկելու դեպքին: Ըստ ոստիկանության` այդ օրը` ժամը 12.30-ի սահմաններում, Երևանի Ն. Տիգրանյան 27 հասցեում գտնվող ավտովերանորոգման կետում ծագած վիճաբանության ընթացքում Սարգիս Բրուտյանը բռունցքով հարվածել էր Արթուր Կարապետյանին, որից հետո` ժամը 17.00-ի սահմաններում, Ա. Կարապետյանը,  նախնական համաձայնության գալով մի խումբ անձանց հետ, վերադարձել էր ավտովերանորոգման կետ, ձեռքերով և ոտքերով հարվածներ հասցրել Արմենակ, Մանուկ և Քրիստ Բրուտյաններին և դիմել փախուստի:

Ոստիկանությունը հունվարի 14-ին տարածած հաղորդագրության մեջ չէր շտապել դեպքին իրավական գնահատական տալ և որոշել խափանման միջոցի ընտրության հարցը` պատճառաբանելով, որ միջադեպի հետևանով աչքի վնասվածք ստացած Քրիստ Բրուտյանի վերաբերյալ դատաբժշկական փորձաքննության պատասխանները դեռ չեն ստացվել:

Yerkir.am-ի հարցմանն ի պատասխան` ոստիկանությունից այսօր հայտնեցին, որ հունվարի 20-ին ստացվել է Քրիստ Բրուտյանի վերաբերյալ նշանակված դատաբժշկական փորձաքննության եզրակացությունը, ըստ որի` նրան պատճառված մարմնական վնասվածքի ծանրության աստիճանը հնարավոր կլինի որոշել ապաքինումից հետո:

Ոստիկանությունից հայտնեցին, որ փաստի առթիվ ոստիկանության Արաբկիրի քննչական բաժնում հարուցված քրեական գործով հունվարի 20-ին Արթուր Կարապետյանին մեղադրանք է առաջադրվել ՀՀ քրեական օրենսգրքի 113 հոդվածի 1-ին մասով, իսկ Ռազմիկ Կարապետյանին, Ռաֆիկ Զոհրաբյանին, Դավիթ Զոհրաբյանին, Արսեն Կարապետյանին, Գեղամ Կարապետյանին, Գագիկ Գևորգյանին, Գագիկ Սահակյանին, Կարապետ Կարապետյանին մեղադրանք է առաջադրվել ՀՀ քրեական օրենսգրքի 117 հոդվածով: Բոլորի նկատմամբ որպես խափանման միջոց է կիրառվել ստորագրությունը չհեռանալու մասին:

Նշենք, որ Արթուր Կարապետյանը «Մանանդ» տաքսի ծառայության սեփականատիրոջ որդին է:

Հարուցված քրեական գործի նախաքննությունը շարունակվում է: