Զինվորներին տանում են ''զբոռնի պունկտ''`փոխելու զորամասը

Հայտնի է, որ, այս տարվանից սկսած, նորակոչիկների զինծառայության վայրի ընտրությունը կատարվում է վիճակահանության սկզբունքով: Ըստ պաշտպանության նախարարության` նպատակը զորակոչն առավել օրինական, արդար և թափանցիկ դարձնելն է, սակայն պարզվում է, որ անգամ այս եղանակը չօգնեց առավելագույնս կանխել միջնորդավորված միջամտությունները և անօրինական գործողությունները:

Yerkir.am-ի տեղեկություններով` հունվարի 14-ին կենտրոնական հավաքակայանում  («զբոռնի պունկտ») վիճակահանության մասնակցած երեք զորակոչիկի, որոնց վիճակվել էր ծառայության անցել Հոկտեմբերյանի զորամասում, այսօր կանչել են հավաքակայան` կրկին վիճակահանության տոմս քաշելու:

Այս պահին հավաքակայանի ճանապարհին գտնվող` Գյումրիից զորակոչված Լևոն Խաչատրյանի հարազատները մեզ հետ զրույցում նշեցին, որ դա անօրինական է, այդ կերպ ցանկանում են փոխել տղաների զորամասերը: Ի դեպ, հարազատները նաև տեղեկացրեցին, որ այդ տղաները զորակոչվելուց հետո հիվանդացել են:

Խնդրի վերաբերյալ yerkir.am-ը պարզաբանում խնդրեց ՀՀ ՊՆ մամլո խոսնակ Արծրուն Հովհաննիսյանից: Նա նշեց, որ կրկնակի վիճակահանություն չի լինելու, պարզապես նրանց կուղարկեն Հոկտեմբերյանին կամ Երևանին մոտ գտնվող այլ զորամաս:

«Հոկտեմբերյանի զորամասը շարային առումով պետք է գերազանց վիճակում լինի: Այդ զինվորներից մի քանիսն ինչ-որ առողջական խնդիրներ ունեն, այդտեղի ծառայությանը չեն համապատասխանում»,- ասաց նա և հավելեց. «Հարցեր կան` կադրերի հետ կապված, օրինակ` տվյալ զորամասն ունի 700 զինվորի հայտ, հետո հաստիքների փոփոխություն է լինում` դառնում է 600»:

Փաստորեն, վիճակահանությամբ որեւէ զորամասում ծառայության անցնելը դեռեւս երաշխիք չէ, որ զինվորն այնտեղ կմնա մինչեւ ծառայության վերջը: