Կուտակայինի մասին օրենքի կասեցված հոդվածներն ի՞նչ են նշանակում

Արդեն հայտնել ենք, որ ՀՀ Սահմանադրական դատարանը որոշում է կայացրել` մինչ մարտի 28-ը կասեցնել «Կուտակային կենսաթոշակների մասին» ՀՀ օրենքի 76-րդ հոդվածի եւ 86-րդ հոդվածի 3-րդ մասի գործողությունը:

Նշենք, որ օրենքի 76-րդ հոդվածը «Պարտադիր կուտակային վճարները չկատարելու կամ ուշացումով կատարելու համար պատասխանատվության ենթարկելու մասին է»: Այսինքն` այժմ դրանք չվճարելու դեպքում տույժեր և պատժամիջոցներ չեն կիրառվի:

Իսկ 86-րդ հոդվածի 3 կետը ֆոնդերի ընտրության մասին է և սահմանում է հետևյալը. «Եթե կառավարչի ընտրություն չի կատարվում, այլապես ընտրությունը կատարվում է սույն օրենքի 10-րդ հոդվածի 1-ին և 2-րդ մասերով և 39-րդ հոդվածով»:

Yerkir.am-ի հետ զրույցում «Դեմ եմ» նախաձեռնության անդամ, իրավաբան Մերի Խաչատրյանը նշեց, որ վերջին հոդվածից կարելի է ենթադրել, որ ՍԴ-ն ժամանակավորապես կկասեցնի նաև օրենքի 10-րդ հոդվածի 1-ին և 2-րդ մասը և 39-րդ հոդվածը: Իրավաբանը խոստացավ օրենքի կասեցման վերաբերյալ առավել ճշգրիտ և ամբողջական մեկնաբանություն տալ որոշման վերաբերյալ ՍԴ-ից պաշտանական պատասխան ստանալուց հետո:

Օրենքի հիշյալ հոդվածներին առավել մանրամասն կարող եք ծանոթանալ այստեղ: