Շիրակի ոստիկանապետն ազատվել է աշխատանքից

Ոստիկանության Շիրակի մարզային վարչության պետ Կարեն Բաբակեխյանն ազատվել է աշխատանքից: Նրան  կփոխարինի ոստիկանության գնդապետ Վարդան Նադարյանը, ով մինչ այդ զբաղեցնում էր ոստիկանության Կոտայքի մարզային վարչության պետի պաշտոնը: 

Այս տեղեկությունը yerkir.am-ի հետ զրույցում հաստատեցին ՀՀ ոստիկանության լրատվության և հասարակայնության հետ կապերի վարչությունից` նշելով, որ Բաբակեխյանն ուղարկվել է կադրերի ռեզերվ: Թե ո՞րն է նրա պաշտոնանկության պատճառը, ոստիկանությունից չհայտնեցին:  Պարզ չէ նաև` Բաբակեխյանն ազատվել է սեփական դիմումի համաձա՞յն, թե՞ ոստիկանապետի հրամանով:

Նշենք, որ երեկ տեղի է ունեցել ոստիկանության կոլեգիայի նիստ, որի ընթացքում Վլադիմիր Գասպարյանը խիստ քննադատության է ենթարկել մի քանի ոստիկանապետերի:

Կարելի է ենթադրել, որ ոստիկանապետի պաշտոնանկության պատճառներից մեկը մարզում, մասնավորապես` Գյումրիում տիրող իրավիճակն է:

Հիշեցնենք, որ հունվարի 20-ին Գյումրիի նախկին քաղաքապետ Վարդան Ղուկասյանի որդին` Սպարտակ Ղուկասյանը, իր ընկերների հետ հերթական «դեբոշն» էր սարքել` կրակոցներ արձակելով ներկայիս քաղաքապետ Սամվել Բալասանյանի տան ուղղությամբ: