Բենզինի տարայով կառավարության մոտ եկած կինը փոխքաղաքապետին սպառնաց ինքնահրկիզվել

Այսօր կառավարության նիստից հետո, երբ Երեւանի փոխքաղաքապետ Կամո Արեյանը դուրս էր գալիս շենքից, նրան մոտեցավ մի կին և սկսեց գոռալ, որ եթե իր խնդիրը չլուծվի, ինքը կառավարության շենքի առջեւ ինքնահրկիզվելու է: Yerkir.am-ի թղթակիցը հետաքրքրվեց կնոջից, թե ի՞նչ խնդիր ունի: Կինը` Գոհար Հովհաննիսյանը,  բենզինի տարան ձեռքին, լաց լինելով, պատասխանեց. «Գնացեք բոլորդ, ոչ մեկիդ չեմ ուզում տենամ, որ ես խնդիր ունեի, ոչ մեկդ չկայիք»:

Կամո Արեյանից հետաքրքրվեցինք, թե ի՞նչ խնդիր կա: «Մասնավորի հետ է կապված խնդիրը, կփորձենք լուծում տալ»,- ասաց փոխքաղաքապետը:

Մինչ այդ կինը շարունակում էր գոռգոռալ, որ իրեն դուրս են հանում իր տարածքից: Կնոջը հանգստացնելու համար Կամո Արեյանը զանգահարեց Կենտրոն վարչական շրջանի ղեկավար Արա Սադոյանին` խնդրելով ընդունել նրան: Կինը կրկին սպառնաց. «Եթե խնդիրս չլուծեք, կտենաք` ինչ եմ անելու»: