Տարեց կինը ցանկանում էր ինքնահրկիզվել նախագահականի առջեւ (ՏԵՍԱՆՅՈՒԹ)

Քաղաքացի Նախշուն Ենգիբարյանն այսօր նախագահական նստավայրի դիմացի մայթին ցանկացել է ինքնահրկիզման փորձ անել։ Epress.am-ի թղթակցի փոխանցմամբ՝ թոշակառու կինը` ձեռքին տոպրակ, մոտեցել է  մետրոյի «Մարշալ Բաղրամյան» կայարանի անցումին, ապա տոպրակից հանել է վառելանյութով շիշը և լուցկու տուփը, սակայն տարածքում հսկողություն իրականացնող ոստիկանները ձեռքից վերցրել են դրանք ու շտապ օգնության մեքենա կանչել։

Այդ ընթացքում Ենգիբարյանը սկսել է պատմել, որ ինքն արդեն որևէ հույս չունի, որ պատկան մարմիններն իր դիմումներին, նամակներին պատասխան կտան, որ արդարադատություն կլինի, և իր որդին, ով ավելի քան 2 տարի գտնվում է կալանքի տակ, ազատ կարձակվի: Նա խնդրում էր ոստիկաններին վերադարձնել բենզինի շիշը՝ ասելով, որ,  միևնույն է, ինքնահրկիզվելու է, ուղղակի ցանկանում էր, որ դա «նախագահը տեսնի»: