Ադրբեջանական ՊՆ-ն իր ժողովրդի հետ աճպարարությամբ է զբաղված

Ադրբեջանական լրատվամիջոցներում տարածվել է, թե առաջնագծում զորամասերից մեկի ռազմական ավտոմեքենայի վթարի հետևանքով տուժել է 3 զինծառայող: Առայժմ նրանց անունները չեն հաղորդվում, բայց Ադրբեջանի պաշտպանության նախարարության մամուլի ծառայությունը շտապել է հաստատել լուրը՝ հավելելով, որ տուժածներին տեղափոխել են հոսպիտալ։  Նրանց առողջական վիճակի մասին ադրբեջանական ԶԼՄ-ներում  առայժմ քար լռություն է։

Հիշեցման կարգով հավելենք, որ հունվարի 19-ի գիշերը Արցախում հայ-ադրբեջանական զորքերի շփման գծի հյուսիսարևելյան (Ջրաբերդ) և հարավարևելյան (Կորգան) ուղղություններում հակառակորդի դիվերսիոն խմբերի ներթափանցման միաժամանակյա փորձեր էին եղել: Դրանք կանխելու ընթացքում հերոսաբար զոհվել էր կրտսեր սերժանտ Արմեն Լևոնի Հովհաննիսյանը։ 

Հայկական կողմի տվյալներով` ադրբեջանցիները տվել էին 3-5 զոհ և մեկ տասնակ վիրավորներ: Սակայն Ադրբեջանի ՊՆ-ն  հանդես էր եկել հայտարարությամբ՝ կտրականապես հերքելով,  որ առաջնագծում վիրավոր կամ զոհ ունեն։ Դժվար չէ կռահել, թե վերը նշված երեք զինվորն ինչ պայմաններում են «վթարի» ենթարկվել: Գրեթե վստահ ենք, որ  առաջիկա օրերին ադրբեջանական առաջնագծում էլի «ավտովթարներ» կլինեն, և զոհերի թիվը աճ կարձանագրի: