Մենք խաղալու ենք միայն հաղթանակի համար. Տիգրան Դավթյան

Այսօր Ավանի ֆուտբոլի ակադեմիայում Գյումրիի «Շիրակ»-ը բաց մարզում անցկացրեց, որից հետո թիմի գլխավոր մարզիչ Վարդան Բիչախչյանը լրագրողների հոտ զրուցեց «Շիրակ»-ի ուսումնամարզական հավաքի ընթացքի, ինչպես նաև ակումբի առաջիկա ծրագրերի մասին:

Նա տեղեկացրեց, որ  հունվարի 25-ին կամ 26-ին կանցկացնեն  ստուգողական հանդիպում «Ուլիս»-ի հետ,  իսկ  հունվարի 30-ին կավարտեն ուսումնամարզական հավաքը, ապա` փետրվարի  2-ին կմեկնեն Լոս Անջելես և կնախապատրաստվեն  փետրվարի 8-ին կայանալիք` «Գալաքսի»-ի հետ հանդիպմանը:

Երկրորդ' երկշաբաթյա  ուսումնամարզական փուլը, ըստ «Շիրակի» գլխավոր մարզչի, կանցկացվի Անթալիայում, որտեղ թիմը կանցկացնի 3 ընկերական հանդիպում:  «Փետրվարի 23-ին կվերադառնանք Հայաստան և կնախապատրաստվենք  ներքին առաջնությանը»,- ասաց Վարդան Բիչախչյանը: 

Խոսելով «Շիրակ»-ի առաջիկա մրցակցի մասին` Բիչախչյանը նշեց. «Լավ առիթ է` «Շիրակ»-ը աշխարհում ճանաչելի դարձնելու համար: Մրցակիցը շատ ուժեղ է: Մենք բանակցություններ ենք վարում մի քանի ֆուտբոլիստների հետ, ովքեր հնարավոր է շուտով միանան թիմին»:

Մարզումից հետո լրագրողների հարցերին պատասխանեց նաև «Շիրակի» փորձառու խաղացող, թիմի ավագ Տիգրան Դավթյանը: Նա նշեց, որ առաջին ուսումնամարզական հավաքը միշտ էլ անցնում է դժվարությամբ:

«Դժվարություն է նաև մարզվել արհեստական խոտածածկի վրա, քանի որ մենք Գյումրիում չունենք նման պայմաններ և սովոր չենք այսպիսի պայմանների:  Առաջնության 2-րդ կեսում ամեն ինչ անելու ենք` լավ հանդես գալու համար:  Չեմպիոնական տիտղոսը պահելը ավելի դժվար է, քան այն նվաճելը»,- շեշտեց թիմի ավագը:  

Խոսելով  մարզավիճակի և «Գելաքսի»-ի հետ կայանալիք հանդիպման մասին` Դավթյանը ասաց.  «Դեռ չեմ հասել իմ լավագույն մարզավիճակին, բայց գնալով բարելավվում եմ:  Մեզ համար ընդհանրապես կապ չունի` խաղը ընկերական է , թե` պաշտոնական: Մենք խաղալու ենք միայն հաղթանակի համար»: