«Ակտոբե» էի եկել ֆուտբոլ խաղալու, ոչ թե խոշոր գումարի համար. Մարկոս

Հայաստանի ազգային հավաքականի հարձակվող Մարկոս Պիզելին Sports.kz-ին տված հարցազրույցում հայտնել է, որ խզել է պայմանագիրը «Ակտոբե»-ի հետ:

 «Գիտեմ որ ակումբի ղեկավարությունը բարձրաձայնել է պայմանագրի մանրամասները և հետևել եմ, թե ինչպես են դրան արձգանքում երկրպագուները: Ցանկանում եմ ասել, որ ես «Ակտոբե» էի եկել ֆուտբոլ խաղալու, և ոչ թե խոշոր գումարի համար: Կհասկանայի երկրպագուների դժգոհությունը, եթե միայն ես ստանայի խոշոր աշխատավարձ, բայց Ղազախստանում հանդես եկող բոլոր լեգեոներներն էլ մեծ գումարներ են վաստակում:

 Ինձ դուր է գալիս «Ակտոբե»-ն և թիմի երկրպագուները և ես պատրաստ եմ զիջումների գնալու թիմում մնալու համար, սակայն ամեն ինչ այնպես է ներկայացվում, որ ես փորձում եմ փախչել ակումբի ֆինանսական խնդիրների պատճառով:

 Ես դեռ մեկ տարի պայմանագիր ունեմ ակումբի հետ, և եթե ցանկանամ կստանամ ինձ հասանելիք գումարը, սակայն իմանալով որ այդ գումարները վճարվում են երկրպագուների և քաղաքացիների կողմից, համաձայնվել եմ պայմանագիրս խզել և ստանալ միայն 2,5 ամսվա գումարը, այսինքն մինչև տրանսֆերային պատուհանի փակվելը, իսկ մյուս 9,5 ամսվա գումարը` մոտ 712.5 հազար դոլար, նվիրում եմ երկրպագուներին և քաղաքի բնակիչներին:

 Շնորհակալ եմ բոլորին աջակցության համար: Ներողություն եմ խնդրում, եթե ինչ-որ բան չի ստացվել, բայց ես փորձել եմ ամեն ինչ անել թիմի համար: Հուսով եմ դեռ կհանդիպենք»-ասել է Մարկոսը: