Հ1-ին ուզում են զրկել գովազդից

Կառավարությունը նպատակ է հետապնդում հեռուստատեսությունների միջեւ ապահովել հավասար մրցակցային դաշտ, եւ դա անելու համար անհրաժշտություն է առաջացել սահմանափակել գովազդի հեռարձակումը ուղղակիորեն պետական բյուջեից սնվող Հանրային հեռուստաընկերության եթերով:

Կառավարությունն այսօր հավանության արժանացրեց ««Հեռուստատեսության եւ ռադիոյի մասին» Հայաստանի Հանրապետության օրենքում փոփոխություն և լրացում կատարելու մասին» և ««Գովազդի մասին» Հայաստանի Հանրապետության օրենքում փոփոխություն կատարելու մասին» Հայաստանի Հանրապետության օրենքների նախագծերի փաթեթը:

Ըստ նախագծի` Հանրային հեռուստաընկերության  եթերում գովազդն այսուհետեւ պետք է արգելվի, բացառությամբ սոցիալական գովազդի: Կթույլատրվի նաեւ հեռարձակել գովազդ` մշակութային եւ սպորտային հաղորդումների հովանավորների անունները նշելու միջոցով:

«Այլ տիպի գովազդների հեռարձակումը Հանրային հեռուստաընկերությամբ կարգելվի, որովհետեւ ինքնին նաեւ գովազդը հանրային հեռուստաընկերություններին բնորոշ չէ, եւ միջազգային պրակտիկայում այս կարգն է գործում»,- նշեց նախագիծը ներկայացնող` ՀՀ արդարադատության նախարար Հրայր Թովմասյանը:

Նա հայտնեց նաեւ, որ այս սահմանափակումները չեն տարածվի Հանրային հեռուստաընկերության արբանյակային հեռարձակման վրա, ինչպես նաեւ միջազգային տարբեր մշակութային եւ սպորտային հաղորդումների վերահեռարձակումների վրա, որոնց ժամանակ այդ գովազդատուների հիշատակումը պարտադիր է: Նման պրակտիկան, նշեց Հրայր Թովմասյանը,  եւս օգտագործվում է: