Սուլոցներ, թմբուկներ, կոչեր. ՀԱԿ-ի երթը` բռնապետության դեմ

Այսօր Ազատության հրապարակում մեկնարկեց Հայ ազգային կոնգրեսի կազմակերպած ամենամյա երթը` նվիրված Մարդու իրավունքների պաշտպանության օրվան:

Նշենք, որ երթն անցկացվում է` սկսած 2008-ից, սակայն մասնակիցների թիվը, նախորդ տարիների համեմատ,  զգալիորեն աճել է: 1000-ից ավելի ցուցարարներ, «Ո’չ բռնապետությանը, ո’չ Սերժ Սարգսյանի ռեժիմին» գրությամբ պաստառն առջևում պահած, քայլեցին Կենտրոնի փողոցներով: Երթին մասնակցում էին ԱԺ ՀԱԿ խմբակցության ղեկավար Լևոն Զուրաբյանը, ՀԱԿ պատգամավորներ Արամ Մանուկյանը, Ստեփան Դեմիրճյանը, Գագիկ Ջհանգիրյանը և այլք:

Լևոն Զուրաբյանն Ազատության հրապարակում ընթերցեց Եվրոպայի խորհրդի գլխավոր քարտուղարին ուղղված բանաձև, որն ակցիայի մասնակիցների անունից հանձնվեց ԵԽ հայաստանյան գրասենյակին: Զուրաբյանը կոչ արեց ՀՀ քաղաքացներին` հետևողականորեն պայքարել իրենց հիմնարար իրավունքների համար:

«Կոչ ենք անում միջազգային հանրությանը, մասնավորապես`  Եվրոպայի խորհրդին և նրա Խորհրդարանական վեհաժողովին, համերաշխություն ցույց տալ ազատության համար պայքարող հայ ժողովրդին և համարժեք միջոցներ կիրառել, որպեսզի Հայաստանի իշխանությունները կատարեն իրենց միջազգային պարտավորությունները ժողովրդավարության և մարդու իրավունքների պաշտպանության գործում»,- ասված էր ԵԽ-ին ուղղված բանաձևում:

Երթի մասնակիցները ՀԱԿ ավանդական կարգախոսներով Մաշտոցի պողոտայով շարժվեցին դեպի Մյասնիկյանի արձանին հարող տարածք, հետո` Հանրապետության հրապարակով` Ազատության հրապարակ` կոչ անելով քաղաքացիներին միանալ իրենց և, Սերժ Սարգսյանին հեռացնելով նախագահի պաշտոնից, հասնել իշխանափոխության: Կառավարության շենքի դիմաց ակցիայի մասնակիցները սկսեցին սուլել, ոմանք անգամ միջնամատը պարզեցին` ի նշան բողոքի:

Մանրամասները` yerkir.am-ի տեսանյութում: