Իմ ձայնը բարձր է. սուլոցներ՝ ծնունդով արարատցի Գագիկ Ջհանգիրյանի ելույթի ժամանակ

Արարատում կազմակերպված` ոչ իշխանական երեք ուժերի իրազեկման հանրահավաքում ելույթ ունեցավ նաեւ ՀԱԿ խմբակցության պատգամավոր Գագիկ Ջհանգիրյանը, ով, ի դեպ, ծնունդով արարատցի է:

«Ուզում եմ Արարատի քաղաքապետի մանր ժուլիկություններին անդրադառնալ: Ցավ է, որ մեր համայնքապետերը գիտեն, թե մարզպետի տեղակալ ու ենթակա են, չգիտեն, որ Սահմանադրությամբ և ՀՀ օրենքներով համայնքի ղեկավարը անկախ է, սա ինքնավարության պաշտոն է, անկախ պաշտոն է»,- ասաց նա:

Գագիկ Ջհանգիրյանի ելույթը սուլոցներով փորձում էին լռեցնել մի խումբ տղամարդիկ, որոնց նա այսպես արձագանքեց. «Ինչքան էլ փորձեք լռեցնել ինձ, միևնույն է, իմ ձայնը բարձր է: Եթե մեր համայնքապետերը չեն իմանում մեր Սահմանադրությունը, օրենսդրությունը, ապա ի՞նչն են ուզում փոխել»:

Նրա խոսքով` միշտ խոսում են, որ սահմանամերձ գյուղերը դատարկվում են, սակայն դատարկվում են նաև Արարատյան դաշտի գյուղերը: «Իմ հարազատ գյուղում տասնյակ տներ փակ են, հողերը չեն մշակվում: Մեր իշխանությունը ժողովրդից օտարված է: Մեզ չհաջողվեց փլուզել այս համակարգը 2008-ին, որովհետև մենք մենակ մնացինք, որովհետև շատ քաղաքական ուժեր չէին համարում, որ եկել է փոփոխությունների պահը: Փառք Աստծո, այն ուժերը, որոնք մեզ հետ չէին 2008-ին, այսօր մեզ հետ են, և ես հուսով եմ, որ մեր միասնականությամբ այս անգամ կհաջողենք: Մենք շատ շանսեր չենք ունենալու, և առաջին անգամ է, որ երեք ընդդիմադիր խմբակցություններ միասնական են հանդես գալիս»,- ասաց Ջհանգիրյանը: