Ուզում են աղ ու հացով դիմավորեն, ուզում են` քացով. կին ազատամարտիկները շարժվեցին Բաղրամյան 26

Yerkir.am-ի թղթակիցը տեղակացնում է, որ այս պահին Ազատության հրապարակում են հավաքվել կին ազատամարտիկները, ովքեր բողոքի երթով պատրաստվում են շարժվել դեպի Բաղրամյան 26: Նրանք բողոքում են երկրում տիրող բոլոր տեսակի անարդարությունների դեմ: Նրանց են միացել խաղաղ պայմաններում զոհված զինվորների ծնողները, մի շարք արվեստագետներ, կին կուսակցականներ:

Ազատամարտիկ Սուսաննա Մարգարյանը Yerkir.am-ի հետ զրույցում նշեց, որ Բաղրամյան 26-ում իրենց են միանալու Կոմիտաս 5-ում շենք կառուցելու դեմ բողոքող բնակիչները: Ի դեպ, Բաղրամյան 26-ի դիմաց ներկա պահին ընթանում է Պարույր Հայրիկյանի բողոքի ակցիան: Սուսաննա Մարգարյանը նշեց, որ այդ ակցիային չեն միանալու, իրենց պահանջներն այլ են:

Հարցին, թե պատրա՞ստ են դիմակայել, եթե ոստիկանությունը ուժ կիրառի, նա պատասխանեց. «Ես չեմ վախենում, որ վախենայի պատերազմ չէի գնա: Իսկ ոստիկանությունը, եթե պետք է ուժ կիրառի, ապա թող կիրառի: Ուզում են աղ ու հացով դիմավորեն, ուզում են` քացով»:

Սուսաննա Մարգարյանը հայտարարեց, որ եթե որեւէ մեկը վախենում է ոստիկաններից, թող իրենց հետ չգնա: