Ազատամարտիկները շարժվեցին դեպի կառավարության շենք

Երկօրյա նստացույցից հետո Արցախյան պատերազմի մասնակից 50-ից ավելի ազատամարտիկներ այսօր Ազատության հրապարակից բողոքի երթ կազմակերպեցին դեպի ՀՀ կառավարության շենք՝ նամակ հանձնելու ՀՀ վարչապետ Տիգրան Սարգսյանին: Ազատամարտիկները կրում էին «Զինծառայողը վարձկան չէ», «Ազատամարտիկների իրավունքները ոտնահարվում են», «Ազատամարտիկներն անտեսված են» կարգախոսներով պաստառներ:

Արդեն հայտնել ենք, որ մայիսի 11-ին Ազատության հրապարակում նստացույց էր սկսել ազատամարտիկ, պահեստազորի գնդապետ Վոլոդյա Ավետիսյանը, ով իշխանություններից պահանջում է վերանայել զինծառայողների կենսաթոշակի հաշվարկման կարգը: Նրան էին միացել մի խումբ այլ ազատամարտիկներ:

Կառավարության շենքի առջև երթի մասնակիցների դիմավորեց ՀՀ կառավարության աշխատակազմի` քաղաքացիների ընդունելության և դիմումների քննարկման վարչության պետ Ալեքսանդր Ղազարյանը: Նա առաջարկեց երթի և նստացույցի հիմնական կազմակերպիչ Վոլոդյա Ավետիսյանին իրենց խնդիրը բանավոր ներկայացնել, իսկ նամակը հանձնել կառավարության շենքում, մյուսներին էլ հորդորեց սպասել:

Ազատամարտիկները նամակը հանձնելուց հետո կրկին կվերադառնան Ազատության հրապարակ և, ամենայն հավանականությամբ, մինչև վաղը կշարունակեն իրենց նստացույցը: