14 տարի տվեցին ″էդ կենդանուն" մի թեթեւ կրակոցի համար

Ես այստեղ տեսնում եմ բարբարոս, վայրենի, գիշատիչ վերաբերմունք մարդու հանդեպ. լրագրողների հետ հանդիպման ժամանակ ասաց ԳԱԱ թղթակից անդամ Հենրիկ Հովհաննիսյանը` խոսելով Վարդան Պետրոսյանի կալանավորման մասին: Նրա կարծիքով` օրենքի մեջ չկա բարոյականություն:

«Կարծում եմ` բոլոր դեպքերում պատասխանատվությունից խուսափել չի կարելի, սակայն Վարդանի հետ նման կերպ վարվելն անմարդկային է: Այս երկրում կա'մ չի գործում անմեղության կանխավարկածը, կա'մ էլ տեղ-տեղ է գործում, երբ ձեռնտու է: Խնդիրը բնազդական ատելությունն է մտավորականի տեսակի հանդեպ, մեր տեսակն ընդունված չէ այս երկրում»,- ասաց նա:

Ըստ Հովհաննիսյանի` մարդիկ դիտավորյալ սպանություն են գործում եւ կարողանում են մարսել դա, իսկ Վարդանի հետ կատարվածն իրավիճակ է, որի մեջ շատերը կարող էին հայտնվել:

«Տիգրան Նաղդալյանին սպանեցին, մի քանի տարի նստեց, եւ վերջ, գործը փակվեց: 14 տարի տվեցին էդ կենդանուն` էպոսագետին, մի թեթեւ կրակոցի համար: Ինչո՞ւ, ի՞նչ հանցագործ էր: Օրենքը եւ բարոյականությւոնը խախտված են, մարդկային խղճի մասին էլ չեմ խոսում»,- ասաց Հովհաննիսյանը:

Հիշեցնենք, որ այսօր մի խումբ մտավորականներ այսօր հանդես են եկել բաց նամակ-երաշխավորագրով` ուղղված ՀՀ գլխավոր դատախազ Գեւորգ Կոստանյանին եւ Կոտայքի մարզի դատախազ Վազգեն Ռշտունուն: Մտավորականները պահանջում են անհապաղ փոխել Վարդան Պետրոսյանի նկատմամբ կիրառված խափանման միջոց կալանքը` անձնական երաշխավորությամբ` հաշվի առնելով այն, որ դերասանը գտնվում է առողջական եւ հոգեբանական ծանր վիճակում: Երաշխավորագիրը ստորագրել են շուրջ երեք տասնյակ մտավորականներ: