Որտեղ էին, ուր հասան. ''Հուրրիյեթ''-ի անդրադարձը Հայաստանի ֆուտբոլի հավաքականին

Tert.am-ը, հղում տալով  թուրքական «Հուրրիյեթ» թերթին, թարգմանել է պարբերականի հոդվածը, որն  անդրադարձել է Հայաստանի ֆուտբոլի ազգային հավաքականի գրանցած հաջողություններին և խաղը համեմատել նախորդ խաղաշրջանների արդյունքների հետ։

«Վերջին օրվա խաղերի ընթացքում ամենաուշագրավ արդյունքներից մեկը գրանցեց Հայաստանի ֆուտբոլի ազգային հավաքականը՝ ոչ-ոքի՝ 2-2, խաղալով Իտալիայի ընտրանու հետ»,- գրել է «Հուրրիյեթ»-ը`   հիշեցնելով, որ 2010թ.-ի Աշխարհի խաղերի նախընտրական փուլում Թուրքիայի հետ միևնույն` 5-րդ խմբում հանդես եկող Հայաստանը հավաքել էր միայն 4 միավոր և զբաղեցրել վերջին հորիզոնականը:

«Այս մրցաշրջանի ընթացքում արդեն Դորտմունդի «Բորուսիայի» պատմության ամենաթանկ տրանսֆերով ֆուտբոլի օրակարգում հայտնված Հենրիխ Մխիթարյանի մասնակցությամբ այն հաղթեց Դանիայի և Չեխիայի հավաքականներին և հավաքեց 13 միավոր»,-գրել է թերթը։