500-600 կալանավոր ազատ է արձակվելու

Այսօր` ժամը 11-ից ,Հայաստանում մեկնարկել է համաներմամբ կալանավորներին ազատ արձակելու գործընթացը: Այս մասին լրագրողների հետ հանդիպման ժամանակ հայտնեց արդարադատության նախարարի խորհրդական Նիկոլայ Առուստամյանը:

Ըստ նրա` համաներման շնորհիվ պատժից կազատվի 500-600 մարդ,  900-1000-ի  պատժաչափը կկրճատվի, բացի այդ` համաներումը կտարածվի նաև այլընտրանքային պատիժ կրող 1500 անձի նկատմամբ: Նախարարի խորհրդականի խոսքով, սակայն, համաներումը չի տարածվի այն անձանց նկատմամբ,  որոնք գտնվում են դատական փուլում, այսինքն` նրանց նկատմամբ դատավճիռն օրինական ուժի մեջ չի մտել:

Նշենք, որ այս համաներումը, որն անկախությունից ի վեր 9-րդն է, ավելի լայն կիրառություն ունի, քան նախորդները:

Yerkir.am-ի հարցին` ինչո՞վ է պայմանավորված համաներման ակտի նման լայն կիրառությունը, Առուստամյանը պատասխանեց, որ սա մարդասիրության էլ ավելի մեծ  դրսևորման ձև է: Բացի դրանից, ըստ նրա, համաներումը տնտեսական առումով  պետությանը մեծ օգուտ կարող է տալ, քանի որ կալանավայրերի գերբեռնվածության խնդիրն ամբողջությամբ կլուծվի:

Առուստամյանը նշեց նաև, որ պատիժը կրող անձը ցանկանա, թե` ոչ, համաներման ակտը  նրա նկատմամբ կիրառվելու է: