Փաստաբանների պալատում քվեաթերթիկներն են հաշվում

Փաստաբանների պալատի նախագահի ընտրություններն ավարտվեցին: Այս պահին ընտրատեղամասը փակ է, կատարվում է քվեաթերթիկների հաշվարկ:

Ընտրելու իրավունք ունեցող 1370 փաստաբաններից ընտրություններին մասնակցել է 913-ը, ինչը, Հաշվիչ հանձնաժողովի նախագահ Ապետնակ Պողոսյանի խոսքով, բավականին բարձր ցուցանիշ է` հաշվի առնելով այն հանգամանքը, որ ՓՊ նախագահի նախորդ ընտրություններում 1372 փաստաբանից մասնակցել են 753-ը:

Նշենք, որ ընտրությունները հիմնականում ընթացան բնականոն հունով` չհաշված փաստաբաններ Երվանդ Վարոսյանի և Վահագն Բաբայանի միջև ծագած վեճը, որն Ապետնակ Պողոսյանի հավաստմամբ` այս ընտրությունների հետ որևէ առնչություն չուներ:

Իսկ ժամեր առաջ էլ շփոթմունք էր առաջացել, երբ փաստաբան Կարեն Թունյանի փոխարեն ստորագրել էր Կարեն Թումանյանը, ինչի առնչությամբ արձանագրություն է կազմվել:

Հիշեցնենք, որ ՓՊ նախագահի պաշտոնում առաջադրված է 3 թեկնածու` Արա Զոհրաբյանը, Կրոմվել Գրիգորյանը և Տիգրան Աթանեսյանը: