Մենք կռվել ենք, որ դուք լավ ապրեք

Ուսման վարձի բարձրացման դեմ պայքարող ուսանողներին են միացել ազատամարտիկները:

Ֆիդայի Էդուարդ Ներսիսյանը, դիմելով ուսանողներին, հորդորեց չընկճվել եւ պայքարել` մինչեւ ուսման վարձի բարձրացման որոշումը չեղյալ համարեն:

«Սիրելի' ուսանողներ, հիմա էլ դուք եք մարտի մեջ: Մի' մոռացեք, որ հայ ազգի կերտողը դուք եք: Մի' զլացեք եւ պայքարեք ձեր ապագայի համար. չէ՞ որ Հայաստանը ձերն է: Անտարբերությունը հավասար է հանցագործության, այնպես որ` պայքարեք: Մենք կռվել ենք, որ դուք լավ ապրեք»,- ասաց Ներսիսյանը:

Ըստ նրա` ուսման վարձի բարձրացումը կնպաստի արտագաղթի աճին: Ներսիսյանը հավաստիացնում է, որ որոշումը կառավարության սխալն է, եւ հենց կառավարությունն էլ պետք է շտկի իր սխալը: