Վճարովի կայանատեղիները կգործեն սեպտեմբերից

Վճարովի կայանատեղիները կգործեն սեպտեմբերից, քանի որ բնակիչների մեծ մասը քաղաքում չէ և տեղյակ չէ նոր փոփոխության մասին: Այս մասին լրագրողների հետ հանդիպման ժամանակ  հայտարարեց «Փարկինգ Սիթի Սերվիս» ընկերության տնօրեն Վազգեն Հարությունյանը:

Ըստ նրա` կայանատեղիների ներդրման համակարգը ներառում է Երևանի բոլոր վարչական շրջանները: «Այս  համակարգի ներդրմամբ կկանխվի որոշ անձանց կողմից ապօրինի դրամահավաքը»,- ասաց նա և հավելեց, որ հավաքված գումարների 70%-ը մտնելու է  ընկերություն, որից 16,6%  վճարվելու է  որպես ԱԱՀ, ինչպես նաև արվելու են այլ վճարումներ: Իսկ  ընկերությանը մնալու է ընդամենը 10% շահույթ: 

Հարությունյանի խոսքով` 12000 դրամանոց տարեկան տուրքը  կգանձվի  2014 թ. հունվարից, իսկ նրանք,  ովքեր արդեն վճարել են, կարող են գումարը հետ պահանջել քաղաքապետարանից:

Ըստ նրա`  ավտոկայանատեղիում մեքենայի վնասվելու դեպքում կազմակերպությունը պատասխանատվություն չի կրում, փոխարենը մեքենայի տերը կարող է դիմել քաղաքապետարան և ստանալ համապատասխան տեսագրությունը:

Հարցին` արդյո՞ք տաքսիների վարորդների համար կլինեն արտոնություններ, Հարությունյանը պատասխանեց, որ տուրքը սահմանված է բոլորի համար: