Ակտիվիստների բողոքների կապակցությամբ ՄԻՊ-ը վարույթ է սկսելու

Երևանի քաղաքապետարանի առջեւ 11 օր  անժամկետ նստացույց հայտարարած  Գոռ Առաքելյանը, Սուրեն Սահակյանը և Վահագն Մինասյանը  կոչով դիմել են  Մարդու իրավունքների պաշտպան Կարեն Անդրեասյանին, որպեսզի նա կարգավորի քաղաքապետարանի առջեւի խոտածածկը չափից ավելի ջրելու, ինչպես նաև իրենց համար վրանի կամ հովանոցի տեղադրման հարցը: Հիշեցնենք, որ ակտիվիստները պահանջում են քաղաքապետարանի տրանսպորտի վարչության պետի և «Երևան տրանս» ՓԲԸ-ի տնօրենի պաշտոնանկությունը:

Yerkir.am-ի հետ զրույցում ՄԻՊ մամլո խոսնակ Նաիրա Կարմիրշալյանը նշեց, որ իրենք այս օրերին վրան կամ հովանոց տեղադրելու կապակցությամբ պաշտպանի կողմից միջնորդելու խնդրանքով դիմում չեն ստացել: Ըստ նրա`  նման ահազանգ իրենց թեժ գծին ստացվել է օրեր առաջ, երբ ոստիկաններն առաջին անգամ խոչընդոտել են ակտիվիստների կողմից վրան տեղադրելու փորձերին: Սակայն ՄԻՊ-ի գրասենյակը դիմում է ստացել խոտածածկը չափից ավելի ջրելու վերաբերյալ:

Ն. Կարմիրշալյանը միաժամանակ հայտնեց, որ Կարեն Անդրեասյանն ուշադրության կենտրոնում է պահում ակտիվիստների բարձրացած խնդիրները և դրանց կապակցությամբ պատրաստվում է վարույթ սկսել: Ըստ նրա` ՄԻՊ ներկայացուցիչները մշտապես այցելում են ակտիվիստներին, լսում նրանց մտահոգող խնդիրները, իսկ հարկ եղած դեպքում անհրաժեշտ  ուշադրություն և աջակցություն ցուցաբերում: