Իսպանացի մեքենավարը վթարից առաջ զրուցել է հեռախոսով

Իսպանիայում հուլիսի 24-ի երեկոյան վթարված գնացքի մեքենավարը վթարից րոպեներ առաջ զրուցել է ծառայողական հեռախոսով. հայտնում է Лента.ру-ն` վկայակոչելով El Mundo-ն:

Մեքենավարի զրուցակիցն է եղել Renfe երկաթուղային ընկերության դիսպետչերը: Նա մեքենավարին Ֆերոլ հասնելու ցուցումներ է տվել, քանի որ վերջինս լավ ծանոթ չի եղել երթուղուն:

Հիշեցնենք, որ գնացքը վթարվել էր հուլիսի 24-ի երեկոյան` Գալիսիա նահանգում: Վթարի արդյունքում զոհվել է 79, վիրավորվել` 130 մարդ: Մեքենավար Գարսոն Ամոն ձերբակալվել է, այնուհետեւ գրավի դիմաց ազատ արձակվել: Վթարի պատճառների պաշտոնական վարկածը դեռ չկա, սակայն ենթադրվում է, որ այն տեղի է ունեցել արագության գերազանցման հետևանքով: