Ադրբեջանում ԵԱՀԿ առաքելության մանդատը փոփոխվել է

ԵԱՀԿ գործող նախագահ, Ուկրաինայի արտգործնախարար Լեոնիդ Կոժարան ողջունել է ուրբաթ օրը ԵԱՀԿ անդամ երկրների հետ ձեռք բերված որոշումը Ադրբեջանում ԵԱՀԿ առաքելության մանդատի վերաբերյալ. տեղեկացնում է  contact.az-ը:

«Բաքվում ԵԱՀԿ նախագծերի կոորդինատորի մանդատի հաստատումը կարեւոր քայլ է ԵԱՀԿ-ի եւ Ադրբեջանի միջեւ փոխշահավետ համագործակցության շարունակման համար` ուղղված ԵԱՀԿ սկզբունքների եւ պարտավորությունների իրականացմանը»,- հուլիսի 26-ի երեկոյան տարածված հաղորդագրության մեջ մեջբերվում են Կոժարայի խոսքերը:

Ըստ ԵԱՀԿ գործող նախագահի`այդ որոշումը դրական պատասխան է Ադրբեջանի կառավարության` այդ հարցում հետագա առաջընթաց ունենալու ցանկությանը:

Առաքելության նոր մանդատը ուժի մեջ կմտնի 2014 թվականի հունվարի 1-ից:

Դեռեւս պարզ չէ, թե կոնկրետ ինչ գործունեություն է հետագայում իրականացնելու Բաքվում ԵԱՀԿ առաքելությունը: Այս տարվա գարնանը պաշտոնական Բաքուն առաջարկել էր փոխել ԵԱՀԿ գրասենյակի կարգավիճակը եւ դրա գործունեությունը դարձնել նախագծերի կոորդինատորի մակարդակի` զրկելով դիտարկումներ իրականացնելու գործառույթից: