Միջադեպ` Կենտրոնի դատարանում

Այսօր  արտակարգ միջադեպ տեղի ունեցավ Կենտրոն և Նորք-Մարաշ ընդհանուր իրավասության դատարանում:

Դատավոր Մնացական Մարտիրոսյանի նախագահությամբ ընթացքող` խոշոր չափերի թմրամիջոցներ ձեռք բերելու, պահելու և իրացնելու մեջ մեղադրվող 9 անձանց  գործով նիստի ընթացքում ամբաստանյալ  Արթուր Պետրոսյանը պլաստիկ շիշ նետեց  մեղադրող դատախազի ուղղությամբ, ինչից հետո դահլիճում մեծ իրարանցում սկսվեց: Ամբաստանյալի մոր` տիկին Լալայի նյարդերը տեղի տվեցին և նա վիրավորական արտահայտություններ հնչեցրեց մեղադրողի հասցեին: Կարգազանց կնոջը հանգստացնելու և դահլիճից դուրս բերելու համար դատական կարգադրիչներից մեծ ջանք պահանջվեց:

Մեղադրող դատախազ Վիգեն Միլիտոնյանն իր մեղադրական ճառում  Արթուր Պետրոսյանի  համար պահանջել էր  15, իսկ նրա կնոջ` Ալլա  Մախովայի համար` 10 տարվա ազատազրկում:

Yerkir.am-ի հետ զրույցում ամբաստանյալների պաշտպան  Կարապետ Աղաջանյանը  կարծիք հայտնեց, որ դատախազի ներկայացրած մեղադրանքն ակնհայտ անհիմն է, իսկ սահմանված առավելագույն պատիժը` ոչ իրավաչափ:  Նա  նշեց, որ այդ մասին ինքը կհայտնի իր պաշտպանական ճառում` հաջորդ դատական նիստին:

Ըստ մեղադրանքի`  Արթուր Պետրոսյանը ՀՀ ԱՆ «Հրազդան» և «Սևան» քրեակատարողական հիմնարկներում պատժի կրման ընթացքում, իրացնելու նպատակով թմրամիջոցներ ձեռք բերելու դիտավորությամբ, Ալբերտ Հարությունի Հակոբյանի օժանդակությամբ 2012թ. մայիսի 3-ին Գագիկ Վիլիկի Քերոբյանից իրացնելու նպատակով ապօրինի ձեռք է բերել զգալի չափի, իսկ 2012թ. օգոստոսի 8-ից մինչև 21-ն ընկած ժամանակահատվածում՝ Ալբերտ Հակոբյանի և իր կնոջ՝ Ալլա Գեորգիի Մախովայի օժանդակությամբ՝ ընդհանուր 14 դեպքով, քննությամբ դեռևս չպարզված անձանցից՝ խոշոր չափերով «բուպրենորֆին» տեսակի թմրամիջոց պարունակող դեղահաբեր, որոնք վերջիններիս օժանդակությամբ իրացնելու նպատակով պահել և իրացրել է Արտաշես Բաղումյանին և այլ անձանց։ Բացի այդ, կրկին իրացնելու նպատակով 2012թ. օգոստոսի 21-ին փորձել է ձեռք բերել խոշոր չափի նույն տեսակի թմրամիջոց, սակայն իր կամքից անկախ հանգամանքներով հանցագործությունն ավարտին չի հասցրել։ 

Իսկ Արթուր Պետրոսյանի կինը մեղադրվում  է  հանցագործությանը միջամտելու մեջ:

Մանրամասները` yerkir.am-ի տեսանյութում: