Խաչիկյանի ընթերցանությունը կիսատ մնաց

Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվեց  Սոցիալական ապահովության պետական ծառայության նախկին պետ Վազգեն Խաչիկյանի և 12  նախկին աշխատակիցների գործով հերթական դատական նիստը:

Հիշեցնենք, որ Խաչիկյանն ու Սոցիալական ապահովության ծառայության այլ աշխատակիցներ մեղադրվում են հանրապետությունից բացակայող անձանց և հանգուցյալների կենսաթոշակները յուրացնելու և պետությանը զգալի չափով վնաս հասցնելու մեջ:

Ինչպես բոլոր նիստերին, այս անգամ ևս Խաչիկյանը նիստերի դահլիճ մտավ գրքերով, սակայն չէր հասցրել սկսել իր ընթերցանությունը, երբ դատավոր Մխիթար Պապոյանը հետաձգեց նիստը: Բանն այն է, որ դատակոչված վկաներից և ոչ մեկ չէր ներկայացել դատարան: Դատավորը հայտարարեց, որ նրանք, հնարավոր է, պատշաճ ծանուցված չեն եղել, քանի որ 4 օր առաջ ոչ աշխատանքային օրեր էին: Պապոյանը նշեց, որ իրենք նոր ծանուցագրեր կուղարկեն և վկաներին կլսեն հաջորդ նիստին, որը նշանակվեց հուլիսի 25-ին:

Դատավարության ընթացքում 191 վկաներից  հարցաքննվել են դեռևս 90-ը: