Էներգետիկայի նախարարն այդպես էլ չհիշեց

ԱԺ-ում կառավարությանն ուղված հարցուպատասխանի ժամանակ ԱԺ ՀԱԿ խմբակցության քարտուղար Արամ Մանուկյանը հետաքրքրվեց, թե ե՞րբ է ստորագրվել գազի գնի բարձրացման պայմանագիրը, ո՞վ է ստորագրել այն, եւ արդյոք պատգամավորը կարո՞ղ է այդ պայմանագրի տեքստին ծանոթանալ:

ՀՀ էներգետիկայի եւ բնական պաշարների նախարար Արմեն Մովիսիսյանը հայտարարեց, որ չի կարող ասել, թե երբ է ստորագրվել, քանի որ չի հիշում, եւ հավելեց, որ, բացի կոմերցիոն բնույթի ինֆորմացիայից, պայմանագրի մնացած մասը կարող է տրամադրել պատգամավորին:

ՀԱԿ պատգամավորն, այդուհանդերձ, կրկին հետաքրքրվեց, թե գոնե ամիսը չի՞ կարող հիշել: «Չեմ հիշում»,- հայտարարեց նախարարն ու ասաց, որ կճշտի` կասի:

Արամ Մանուկյանն էլ նշեց, որ հարցի ենթատեքստն այն է, որ երկու փաստ պիտի համեմատի` Սերժ Սարգսյանը մարտ ամսին ելույթ է ունեցել եւ «հերյուրանք» է անվանել գազի գնի թանկացման մասին խոսակցությունները, երկրորդ՝ այդ պայմանագիրը ստորագրվել է նախագահական ընտրություններից առա՞ջ, թե՞ հետո:

Նախարարն էլ հերթական անգամ հավաստիացրեց, որ նախագահական ընտրությունների հետ դա պետք չէ կապել: