Նախարարի ու կենգուրուի մենամարտն ավարտվել է վերջինիս հաղթանակով

Ավստրալիայի մայրաքաղաք Կանբերայի խորհրդարանի պատգամավոր եւ տարածքային նախարար` 41-ամյա Շեյն Ռետենբերին առավոտյան վազքի ժամանակ կենգուրուին պատահաբար սադրել է հարձակման. տեղեկացնում է ИТАР-ТАСС-ը: Վազորդը չի նկատել կենդանուն եւ քիչ է մնացել` ոտքի տակ գցի: «Երկուսս էլ շատ վախեցանք, իսկ երբ կենգուրուն ինչ-որ բանից վախենում է, հարձակման է անցնում»,- հետագայում պատմել է նախարարը:

Եթե հաշվի առնենք, որ կենգուրուն  գործի է դնում իր վերջույթները, ապա պարզ է, որ մարդը շանս չունի` լիակատար նոկաուտ:

Անգիտակից վիճակում ճանապարհին ընկած Ռետենբերիին օգնության է հասել մի անցորդ եւ հասցրել հիվանդանոց: Վերքերը այնքան էլ ծանր չեն եղել, եւ մի քանի ժամ անց նախարարը կարողացել է աշխատանքի գնալ, ընդ որում` նրա գործընկերները հետաքրքրվել են ոչ թե նրա առողջությամբ, այլ` թե չի՞ վնասվել, արդյոք, կենգուրուն: