Պետրոս Մակեյանը Լեւոն Տեր-Պետրոսյանին Ազատության հրապարակ է կանչում

«Ամեն նախագահական ընտրությունից հետո դուք այս հրապարակում եք մնում, պայքարում եք, սակայն իշխանությունը մնում է անփոփոխ: Շատերիդ մազերն այս հրապարակում սպիտակեցին, բայց մեր պայքարը շարունակվում է, իշխանությունը սարսափած է ձեզանից: Մենք Ձեզ հետ միասին մոտենում ենք այս պայքարի հիմնական հանգրվանին՝ ապրիլի 9-ին: Այդ օրը մեր ժողովրդի հիմնական հավաքատեղին պետք է լինի Ազատության հրապարակը: Այս անգամ ապրիլի 9-ին յուրաքանչյուրը պետք է գա Ազատության հրապարակ, պայքարի այս վերջնական փուլին մասնակցի»,- այսօրվա հանրահավաքում հայտարարել է «Ժողովրդավարական հայրենիք» կուսակցության նախագահ Պետրոս Մակեյանը:

Նշելով, որ ժողովուրդը պետք է լինի խաղի հիմնական գործոնը, սակայն իշխանությունն ուզում է նրան խաղից դուրս հանել, Մակեյանն ավելացրել է. «Ոչ, ժողովրդի դեմ խաղ չկա»:

ՀԱԿ-ի նախկին ներկայացուցիչն այնուհետեւ, ոչ ուղղակիորեն ակնարկելով Լեւոն Տեր-Պետրոսյանին, կոչ է արել Ազատության հրապարակում նախկինում պայքարած ընդդիմադիր առաջնորդներին հրապարակում լինել նաեւ ապրիլի 9-ին: