Սպանվել է ազնիվ, անկաշառ, հայրենիքին ու ժողովրդին նվիրված հայորդի

Շուշիի առանձնակի գումարտակի ազատամարտիկների միավորումը հետամուտ է լինելու իր մարտական ընկեր, Պռոշյանի գյուղապետ Հրաչ Մուրադյանի նենգաբար սպանության նախաքննության ընթացքին, հանցագործության բացահայտմանը, ինչպես նաև կատարողների և պատվիրատուների նկատմամբ օրենքով նախատեսված առավելագույն պատժի կիրառմանը: Այս մասին ասված է ՇԱԳԱՄ-ի տարածած հայտարարության մեջ:

«Այսօր հողին հանձնեցինք մեր մարտական ընկեր Հրաչ Մուրադյանին, որի նենգաբար սպանության լուրն ինչպես յուրաքանչյուր ազատամարտիկի, այնպես էլ ցանկացած հայ մարդու մոտ առաջացրել է մեծ ցավ և զայրույթ:

Դավադիր գնդակն, ինչը կարող էր արձակվել միայն թշնամու կողմից, մեր պայքարի շարքերից ֆիզիկապես հեռացրեց Հայոց Ազատամարտի նվիրյալներից մեկին: Կրկին սպանվել է ազնիվ, անկաշառ, հայրենիքին ու ժողովրդին նվիրված հայորդի: Սա հերթական սրբապղծությունն է, ինչը տեղի է ունենում իշխող ռեժիմի օրոք: Հրաչն ու մեր բոլոր նահատակներն անմահ են:

ՇԱԳԱՄ-ը հետամուտ է լինելու նախաքննության ընթացքին, հանցագործության բացահայտմանը, ինչպես նաև կատարողներին և պատվիրատուներին օրենքով նախատեսված առավելագույն պատժի իրականացմանը:

ՇԱԳԱՄ-ը խորը վշտով ցավակցում է Հրաչ Մուրադյանի ընտանիքին, մերձավորներին, հարազատներին և ընկերներին»: