Հայ ժողովրդին հաղթել հնարավոր չէ. Կիմ Բակշի

Մարտի 22-ին Մոսկվայում, «Ռուս-հայկական համագործակցություն» կազմակերպության եւ Մոսկվայի համալսարանի հայ ուսանողների ասոցիացիայի նախաձեռնությամբ, հանդիպում էր կազմակերպվել  գրող, կինոդրամատուրգ Կիմ Բակշիի հետ: «Հայաստանը` բարեկամների աչքերով» նախագծի նպատակն է հայերին ցույց տալ, թե ինչով կարող են հպարտանալ, եւ ինչ թերություններ կան, որոնցից անհրաժեշտ է ձերբազատվել. տեղեկացնում է «Երկրամասը»:

Կիմ Բակշին անթաքույց հաճույքով ուսանողներին ներկայացրել է հին հայկական մշակույթում իր բացահայտումները: Նա հայկական ձեռագրերի եւ մարդկային ճակատագրերի մասին 7 գրքի հեղինակ է, եւ պատմել է, թե ինչու է սիրում Հայաստանը եւ դրա բազմաչարչար ժողովրդին: 

Ուսումնասիրելով Հայաստանի պատմությունը` նա ցանկացել է բացահայտել, թե ինչու են հայերը գոյատեւել, մինչդեռ մյուս հին ժողովուրդները` ասորիները, բաբելոնացիները եւ այլն, անհետացել: Եվ նա հայտնաբերել է մշակույթի տեսությունը` հայերին, որպես ժողովուրդ, փրկել է գիրքը:

«Հայ ժողովրդի ինքնապահպանության բանաձեւը այս տեսքն ունի` լեզու, կրոն, պատմություն, մշակույթ: Այդ հիմնական խարիսխներն են, որոնք պահպանել են հայ ժողովրդին»,- համարում է գրողը` հավելելով, որ գլխավորը, որ տալիս է մշակույթը, թույլ չի տալիս մարդուն գազանանալ: Նա համոզված է` նման հզոր մշակութային ժառանգություն ունեցող ժողովրդին հաղթել հնարավոր չէ:

«Ինձ համար վիրավորական է, երբ ադրբեջանական ղեկավարությունը հայերին «եկվոր» է անվանում: Ի՞նչ եկվոր, երբ ամբողջ Արցախը այն ժամանակների հնագույն հուշարձաններով է պատված, երբ ոչ միայն Ադրբեջանում ադրբեջանցիներ չկային, նաեւ այդ հասկացությունը չկար: Գոյություն ուներ իրանական Ադրբեջանը, որտեղի ժողովուրդն այլ է: Ամոթ է, երբ երկրի նախագահը նման բաներ չգիտի»,- հայտարարել է Բակշին:

Ըստ նրա` հայերը կարող են հպարտանալ նրանով, որ, սփռված լինելով ամբողջ աշխարհում, չեն կորցնում իրենց ինքնությունը, կապը Նախամոր հետ: «Դուք գիտեք ձեր արմատներ, դուք ամեն ինչ գիտեք ձեր մասին, իսկ դա նշանակում է, որ մշակութային ճգնաժամ հայ ժողովրդին չի սպառնում»,- ասել է գրողը` հավելելով, որ կարեւոր է` պատերազմ չլինի, իսկ անհրաժեշտության դեպքում հայերը` հանձին իրեն, եւս մի զինվոր կունենան: