Վահրամ Փափազյանի արվեստն եւ ժառանգությունը

Մարտի 21-ին «Գաֆեսճյան» արվեստի կենտրոնում տեղի կունենա «Հանդիպում արվեստի հետ» շարքի հերթական միջոցառումը, որը կնվիրվի հայ մեծանուն դերասան Վահրամ Փափազյանի 125-ամյակին. այս մասին yerkir.am-ի հետ զրույցում նշեց «Գաֆեսճյան» արվեստի կենտրոնի մամուլի պատասխանատու Լիլիթ Սոխակյանը:

Նա նաեւ տեղեկացրեց, որ միջոցառումը տեղի է ունենալու Ազգային թատերական ստեղծագործական միավորման հետ համագործակցությամբ:

«Երեկոյի ընթացքում կլինի բանախոսություն Վահրամ Փափազյան արվեստի ու ժառանգության մասին, որը կվարի արվեստագիտության դոկտոր, պրոֆեսոր, ԳԱԱ թղթակից անդամ, գիտության վաստակավոր գործիչ Հենրիկ Հովհաննիսյանը: Իսկ երկրորդ մասում կցուցադրվի տեսանյութ` Վահրամ Փափազյանի հայտնի մենախոսության եւ ելույթների եզակի ձայնագրություններով»,- ասաց Սոխակյանը:

Միջոցառման մուտքն անվճար է, սակայն անհրաժեշտ է գրանցվել: