Սերգեյ Նակարյակովը եւ Մարիա Մեյերովիչը հանդես կգան համատեղ համերգով

Մարտի 15-ին «Արամ Խաչատրյան» համերգասրահում տեղի կունենա Հայաստանի պետական ֆիլհարմոնիկ նվագախմբի հերթական համերգը: Ֆիլհարմոնիկի հետ համատեղ համերգով հանդես կգան շեփորահար Սերգեյ Նակարյակովը, դաշնակահարուհի Մարիա Մեյերովիչը եւ դիրիժոր Ջոն Վիկտորին Յուն:

Լրագրողների հետ հանդիպման ժամանակ Ջոն Վիկտորին Յուն նշեց, որ արդեն երրորդ անգամ է Հայաստանում եւ յուրաքանչյուր անգամ հաճույքով է գալիս այստեղ:

«Հրաշք է Շոստակովիչ կատարել նման երաժիշտների հետ, քանի որ մեր երկրում բավական երկար ժամանակ արգելված էր Շոստակովիչը: Իսկ ֆիլհարմոնիկ նվագախումբն, արդեն գաղտնիք չէ, որ տարբերվում է իր յուրօրինակ ձայնով. այն շատ երգեցիկ է: Ֆիլհարմոնիկն էմոցիոնալ մոտեցում ունի երաժշտության նկատմամբ, այն նման է հայկական խոհանոցին»,- ասաց դիրիժորը` հավելելով, որ հատկապես ուրախ է, որ համերգին հնչելու է նաեւ իր խմբագրած` Բրուքների 3-րդ սիմֆոնիան. «Ի դեպ, ես նաեւ հայկական երաժշտությանն եմ ծանոթ ու ոչ միայն Արամ Խաչատրյանին: Երբեմն մեր երկրում համերգներին նաեւ հայկական երաժշտություն ենք կատարում»:

Սերգեյ Նակարյակովն էլ նշեց, որ յուրաքանչյուր անգամ սիրով է գալիս Հայաստան եւ չնայած շեփորահարների համար  ստեղծագործությունների ցանկը մեծ չէ, բայց գոհ է համերգի համար ընտրված ծրագրից:

Դաշնակահարուհի Մարիա Մեյերովիչը Հայաստանում եղել է յոթ տարի առաջ: Ըստ նրա` հայերը շատ ջերմ են: «Հիանալի նվագախումբ ունեք, որը համերգի ժամանակ շատ է օգնում մենակատարին»,- նշեց դաշնակահարուհին:

Համերգային ծրագրում կհնչեն Հայդնի «Թավջութակի կոնցերտը»`փոխադրված շեփորի համար, Շոստակովիչի «Կոնցերտ դաշնամուրի, շեփորի եւ լարային նվագախմբի համար» եւ Բրուքների «Սիմֆոնիա թիվ 3»-ը, որը հայաստանյան պրեմիերա է լինելու: