Բանկերը չեն կարող բարձրացնել գյուղատնտեսական վարկերի տոկոսադրույքները

Կառավարությունը շարունակվելու է գյուղատնտեսական վարկերի տոկոսագումարների սուբսիդավորման գործընթացը. Այսօր կայացած մամուլի ասուլիսում ասաց ՀՀ գյուղատնտեսության նախարար Սերգո Կարապետյանը:

Նա նշեց, որ գյուղատնտեսական վարկեր գյուղացիներին բանկերը տալիս են 14 տոկոս տոկոսադրույքով, իսկ գյուղացիական տնտեսություններն այդ վարկերը ստանում են 10 տոկոսով` մնացած 4 տոկոսը սուբսիդավորվում է պետության կողմից: «Այս վարկերից արդեն օգտվել են 43 հազարից ավելի գյուղացիական տնտեսություններ, եւ տրամադրվել է 32 միլիարդ դրամից ավելի վարկային միջոցներ»,- ներկայացրեց գյուղատնտեսության նախարարը:

yerkir.am –ի հարցին, թե գյուղացիները բողոքում են, որ գյուղատնտեսական վարկերի ստացման ժամանակ բանկերը կիրառում են ռիսկերի կառավարման կրկնակի միջոցներ` նախ բարձր տոկոսադրույքով են վարկերը տրամադրվում եւ հետո` գրավադրվող գույքն են ցածր գնահատում, նախարար Սերգո Կարապետյանը պատասխանեց, թե այդպիսի բան չկա, քանի որ տոկոսադրույքը սահմանված է պետության կողմից եւ ոչ մի բանկ այն բարձրացնելու իրավունք չունի:

Նախարարը հերքեց նաեւ կրկնակի երաշխիքների կիրառումը բանկերի կողմից, նշելով, թե այդպիսի բողոքներ իրենք չեն ստացել, ու եթե լինեն այդպիսի բողոքներ, կուսումնասիրեն եւ համապատասխան լուծումներ կգտնեն: