Հովիկ Աբրահամյանը զարմացավ` Խաչատուր Սուքիասյանի անունը լսելով

«Հրապարակ» օրաթերթն ասյօր գրել էր, որ իշխանական կուլիսներում սկսել են քննարկել Երևանի ավագանու ընտրությունները, եւ որ քննարկվում է այլընտրանքային թեկնածուի հարցը, ով կլինի կոմպրոմիսային` կընդունվի և'  իշխանության, և' ընդդիմության կողմից, եւ որ այդ թեկնածուն կլինի Խաչատուր Սուքիասյանը:

ԱԺ-ում լրագրողների հետ ճեպազրույցում, որպես հավանական, կոմպրոմիսային թեկնածու, լսելով Խաչատուր Սուքիասյանի անունը, Հովիկ Աբրահամյանը նախ զարմացավ. «Ո՞վ, Խաչատուր Սուքիասյանը՝ քաղաքապե՞տ: Որտեղի՞ց են վերցրել: Նման բան չկա, ես տեղյակ չեմ: Մենք անգամ սեփական թեկնածուի հարցը դեռ չենք քննարկել»:

Դիտարկմանը, թե մամուլն է այդ մասին գրել, ԱԺ նախագահը հայտարարեց, որ հիմա մամուլն այնքան է փչացել, որ չգիտես` որ գրածն է ճիշտ, որը` սուտ: