255 ահազանգ` Պաշտպանի թեժ գծին

ՀՀ նախագահի ընտրությունների ամբողջ ընթացքում Մարդու իրավունքների պաշտպանի 116 թեժ գծի և արագ արձագանքման ծառայությունը ստացել է 255 ահազանգ. հայտնում է ՄԻՊ գրասենյակը:

Այդ ահազանգերից 43-ի դեպքում քաղաքացիները կարիք են ունեցել իրավաբանական խորհրդատվության, ստացել են այն և կարողացել են լուծել իրենց հուզող խնդիրը:

52 ահազանգեր նույնիսկ առերևույթ հիմնավոր չեն եղել, այսինքն՝ գանգատը չի պարունակել մարդու իրավունքների խախտում, կամ ահազանգում չի ներկայացվել ըտրախախտման գեթ մեկ փաստական հանգամանք:

Ընտրողների անձնագրերում դրվող կնիքի թանաքի հետ կապված խնդիրներով Պաշտպանին ահազանգել են 68 քաղաքացիներ: Այս կապակցությամբ Պաշտպանը իր դիտողություններն ու առաջարկը գրավոր և հրապարակային կներկայացնի Կենտրոնական ընտրական հանձնաժողովին: 

38 ահազանգերը վերաբերել են ընտրացուցակներում տեղ գտած անճշտություններին, որոնց վերաբերյալ տեղեկատվությունը ամբողջությամբ ներկայացվել է Ոստիկանություն`ընտրացուցակներում համապատասխան ուղղումներ իրականացնելու համար:

20 ահազանգեր վերաբերել են քվեարկության օրը տեղի ունեցած տեխնիկական բացթողումներին, կուտակումներին և քվերակության գործընթացի այլ շեղումներին:  Դրանց վերաբերյալ ահազանգողներին տրվել է հստակ ուղղորդում և խորհրդատվություն, թե ինչպես արձանագրել նման անկատարությունները և թե ինչպես դրանք ներկայացնել համապատասխան ընտրական հանձնաժողովներին:

Քվեարկության մատչելիությունից դժգոհելով` Պաշտպանին ահազանգել է հաշմանդամություն ունեցող 9 անձ: Այս կապակցությամբ նախկին ձեռքբերումները ամփոփելով և ապագա արագ վերափոխումների ակնկալիքով՝ Պաշտպանը կգործակցի Տարածքային կառավարման նախարարության և առանձին համայնքների ղեկավարների հետ:

Մնացած 25 ահազանգերը վերաբերել են ընտրակաշառքներին, կրկնակի քվեարկությանը և այլ հանցակազմ պարունակող արարքներին: Պաշտպանը հատկապես կարևորում է ընտրահանցանքների լիարժեք և օբյեկտիվ հետաքննությունն ու բացահայտումը: Վաղը, նախապես ստանալով ահազանգողների համաձայնությունը, ընտրահանցանքների մասին Պաշտպանի ունեցած ողջ տեղեկատվությունը կներկայացվի թե' Ոստիկանությանը, և թե' հանրությանը: Պաշտպանը վստահ է՝ «Նույնիսկ այս 25 դեպքերի լիարժեք բացահայտումը կամ դրանց որոշ մասի իրապես համոզիչ հերքումը կարող է չափազանց դրական անդրադառնալ արդարության վերականգման, հասարակության վստահության հաստատման, ինչպես նաև հետագայում նման հանցանքների կանխարգելման համար: Հետևաբար, անհրաժեշտ է հետևողական աշխատանք: Անհրաժեշտ է բացահայտել և պատժվել բոլոր ընտրահանցագործներին»: