ԱՊՀ դիտորդներն ընտրությունները կայացած են համարում

ԱՊՀ դիտորդական առաքելության կազմում եղել է 215 դիտորդ ԱՊՀ տարբեր երկրներից. լրագողներին այսօր հայտնեց ԱՊՀ դիտորդական առաքելության ղեկավար Սերգեյ Լեբեդեւը:

Նա ներկայացրեց ՀՀ նախագահական ընտրությունների նախընտրական փուլի եւ բուն ընտրությունների գործընթացների` իրենց դիտարկման արդյունքները: Բանախոսը նշեց, որ Հայաստանի նախագահական ընտրությունները, դիտորդների կարծիքով, նորմալ ընթացք են ունեցել: Դիտորդը գովեց Հայաստանի Հանրապետության ընտրական օրենսդրությունը, անդրադարձավ նախընտրական շրջանին` նշելով, որ բոլոր թեկնածուներն ունեցել են իրենց ասելիքը հանրությանը ներկայացնելու հնարավորություն եւ այլն:

Լեբեդեւը նշեց նաեւ դիտորդների արձանագրած մի քանի խախտումներ: Մասնավորապես` նա անդրադարձավ ընտրացուցակներին, երբ մարդիկ իրենց անունները չեն կարողացել գտնել, խոսեց նախագահի թեկնածուներից մեկի նկարը ընտրատեղամասում փակցված լինելու դեպքի մասին` նշելով, սակայն, թե դրանք մասսայական բնույթ չեն կրել ու չեն ազդել ընտրությունների բուն ընթացքի:

Դիտորդական առաքելության ներկայացուցիչը հատկապես կարեւորեց, որ Հայաստանը դիտարկվում է որպես բարեկամ կողմ, ուստի վատ բաներ բարեկամների մասին ասել ինքը չի ուզում, առավել եւս, երբ դրանք հիմնականում տեխնիկական բնույթ են կրել: Լեբեդեւը հիշեց նաեւ նախագահի թեկնածու Պարույր Հայրիկյանի դեմ կատարված մահափորձի եւ թեկնածու Անդրիաս Ղուկասյանի հացադուլի մասին:

Լեբեդեւն ընթերցեց ԱՊՀ դիտորդական առաքելության եզրակացությունը` փետրվարի 18-ին Հայաստանում անցկացված նախագահական ընտրությունների մասին եւ հիշեցրեց, որ այն ստորագրել են առաքելության մասնակից բոլոր երկրների խմբերի ղեկավարները:

Նա նշեց նաեւ Հայաստանի ընտրական գործընթացներին վերաբերող այլ մանրամասներ եւս, որոնց կարող եք ծանոթանալ տեսանյութում: