Կաթողիկոսի աշխարհիկ քարոզները. ՛՛Հայկական ժամանակ՛՛

Հայ Առաքելական եկեղեցին հավաքում է բոլոր իր սպասավորների անձնագրերի պատճենները: Պաշտոնապես դա բացատրել են նրանով, թե աշխատավարձը պետք է դարձնեն բանկային քարտով: Անձնագրերի պատճենների հավաքագրումը սկսվել է Ն.Ս.Օ.Տ.Տ Գարեգին Բ-ի՝ նախանցած շաբաթ Արարատյան թեմի առաջնորդարան կատարած այցից հետո: Նա բավական երկարատև մի ժողով է անցկացրել, խոսել է նաև նախընտրական թեմաներով, մասնավորապես՝ առաջիկա ընտրություններին «ակտիվ մասնակցություն» ապահովելու անհրաժեշտության մասին:

«Հայկական ժամանակ» օրաթերթի աղբյուրների համաձայն, անձնագրերի պատճեները հավաքվելու են ամբողջ հանրապետությունով մեկ սփռված եկեղեցական ենթակայության կառույցներից, այդ թվում՝ Էջմիածնի եւ Սևանի ճեմարանների սաներից: Գործի գլխավոր պաասխանատու է նշանակվել Արարատյան թեմի առաջնորդական փոխանորդ Տ. Նավասարդ արքեպիսկոպոս Կճոյանը: