80.000 դրամ հարկը քիչ է ատամնաբույժներին

Ատամնաբույժների համար ամսական 80 հազար դրամը շատ ցածր հարկային բեռ է` այլ ոլորտների հետ համեմատած: Լրագրողների հետ ճեպազրույցում վարչապետ Տիգրան Սարգսյանն անդրադարձավ նաեւ հարկային փոփոխություններից դժգոհող ատամնաբույժների հաշվարկներին և նշեց, որ այդ փոփոխություններով ոլորտում մենաշնորհ մտցնելու մասին վերլուծություններն անհիմն են:

Ըստ նրա` այն «անարդարության» մասին, թե ատամնաբուժարաններն աշխատում են բարձր շահութաբերությամբ, բայց հարկեր քիչ են վճարում, բարձրաձայնել են տաքսիստները:

«Մեկ շնչին ընկնող ատամնաբուժարաններով ու ատամնաբույժներով Հայաստանն աշխարհում առաջիններից է, այլ երկրներից գալիս են այստեղ՝ ատամը բուժելու, քանի որ ծառայության որակը բարձր է»,- հայտարարեց Տիգրան Սարգսյանը:

Ատամնաբույժներն այս ամենից հետո զանգվածաբար չեն լքի Հայաստանը, ծառայության գներն էլ չեն բարձրացվի: Այնուամենայնիվ, եթե վարչապետի վերջին սպասելիքները չիրականանան, լուրջ քայլերի կանցնեն արդեն համապատասխան մարմինները: Համենայն դեպս, այսպես է կարծում վարչապետը: