Սերժ Սարգսյանը շատ կրակոտ երիտասարդ է եղել

Գործող նախագահ, նախագահի ՀՀԿ-ական թեկնածու Սերժ Սարգսյանի ինչպես բոլոր, այնպես էլ Մալաթիա-Սեբաստիա համայնքի բնակիչների հետ ունեցած նախընտրական հանդիպման ժամանակ գտնվեցին մի քանիսը, ովքեր ջանք ու եռանդ չխնայեցին` գովեստի խոսքեր շռայլելու համար Սերժ Սարգսյանի հասցեին:

«Հայրենասեր եւ պատերազմի բոհով անցած մարդը մեր ժողովրդին կտանի դեպի լուսավոր եւ ապահով Հայաստան: Դուք այնքան հայրենասեր եւ հանդուրժող մարդ եք, որ մենք սիրում եւ վստահում ենք Ձեզ»,- հայտարարեց մի տիկին:

Սերժ Սարգսյանը կեսկատակ-կեսլուրջ հետաքրքրվեց. «Շնորհակալ եմ, բայց ուսանող ժամանակ է՞լ եմ հանդուրժող եղել, ճիշտն ասա»:

Նախագահի հարցադրմանն ի պատասխան` տիկինը հայտարարեց. «Դուք ուսանող ժամանակ շատ կրակոտ երիտասարդ էիք եւ շատ անհանգստացնում էիք մեր դասախոսներին»:

Պարզվում է կինը, որը ելույթ էր ունենում, Սերժ Սարգսյանի համակուրսեցի Ռուզաննա Ազիզյանն էր, որի հետ հարցազրույցը Yerkir.am-ը կներկայացնի վաղը: Մենք փորձել ենք պարզել, թե ինչպիսի ուսանող է եղել Սերժ Սարգսյանը, արդյո՞ք կազմակերպել է, որ դասերից փախչեն, եւ ի՞նչ նկատի ուներ տիկինը` կրակոտ ասելով: