Թեկնածուներից ով որ հորիզոնականում կլինի

ՀՀԿ կենտրոնական գրասենյակում, որը նաեւ գործող նախագահ, նախագահի ՀՀԿ-ական թեկնածու Սերժ Սարգսյանի նախընտրական շտաբն է, այս օրերին եռուզեռը չի դադարում: Լրագրողների մուտքը, սակայն, արգելված է, եթե նախնական պայմանավորվածություն` «ժամադրություն» չունես,  շենք մտնել չես կարող:

ՀՀԿ կենտրոնական գրասենյակում այս օրերին կարելի է տեսնել այնպիսի կորած-մոլորած ՀՀԿ-ականների, որոնց մեկ էլ հինգ տարի առաջ կարող է տեսած լինես: ՀՀԿ-ականներն անգամ կատակում են, որ ընտրությունը չլիներ, «իրար գլխի մեկ էլ եսիմ երբ կհավաքվեինք»:

ՀՀԿ «շտաբականների» կյանքից Yerkir.am-ին մի ուշագրավ իրադարձություն է հայտնի դարձել: Պարզվում է` մի քանի ՀՀԿ-ականներով արդեն որոշել են նախագահական ընտրություններում թեկնածուների զբաղեցրած դիրքերը` ըստ հավաքած ձայների:

Եվ այսպես` ինչպեսեւ սպասվում էր, առաջին հորիզոնականում Սերժ Սարգսյանն է, երկրորդը` Րաֆֆի Հովհաննիսյանը, երրորդը` Պարույր Հայրիկյանը, չորրորդը` Հրանտ Բագրատյանը, հինգերորդը` էպոսագետ Վարդան Սեդրակյանը, վեցերորդը` Անդրիաս Ղուկասյանը, յոթերորդը` Արման Մելիքյանը, եթե, իհարկե, վերջին երկուսը դուրս չգան ընտրապայքարից: