Կալանավորվել է նախագահի եղբոր ընկերը

Խարդախությամբ 120 հազար դոլար հափշտակելու կասկածանքով կալանավորվել է Վլադիսլավ Մանգասարյանը, ով հանրության շրջանում հայտնի է ամերիկահայ գործարար Էդմոն Խուդյանի գործից: Վերջինիս պնդմամբ` Մանգասարյանը խաբեությամբ տիրացել է իր շահույթին: Այս գործը քննվում է ՀՀ պետեկամուտների  կոմիտեում և որևէ կապ չունի Մանգասարյանի կալանավորման հետ: Մանգասարյանի կալանավորման լուրը yerkir.am-ի հետ զրույցում հաստատեցին ոստիկանությունից:

Տվյալ գործով տուժողը Արտաշես Շահբազյանն է: Ըստ նախաքննության ձեռք բերած ապացույցների` մեղադրյալը չարաշահելով տուժողի վստահությունը՝ խաբեությամբ հափշտակել է նրա խոշոր չափերի գումարը՝ 65 մլն ՀՀ դրամին համարժեք 180 հազար ԱՄՆ դոլարը: Վ.Մանգասարյանն, ըստ գործի տվյալների, տուժողի հետ պայմանավորվածությամբ, նոտարական կարգով ձեռք է բերել Ա.Շահբազյանի` Դավթաշեն թաղամասում գտնվող երկու բնակարանները օտարելու իրավունք, որպեսզի վաճառքի գումարով՝ մոտ 65 մլն ՀՀ դրամ, արգելանքից հանի Երևանի կենտրոնում գտնվող իր՝ Վ.Մանգասարյանի երկու բնակարանները, վաճառի դրանք և վերադարձնի Արտաշես Շահբազյանի պարտքը: Սակայն Վ.Մանգասարյանը հիշյալ գումարը բաժանել է իր այլ պարտատերերին: 

Մանգասարյանը ձերբակալվել է նախօրեին և տեղափոխվել է ՀՀ ԱՆ «Նուբարաշեն» քրեակատարողական հիմնարկ: 

Հիշեցնենք, որ շաբաթներ առաջ մի քանի լրագրողների հետ հանդիպման ժամանակ նա պատմել էր իր և ՀՀ նախագահ Սերժ Սարգսյանի եղբոր` Լևոն Սարգսյանի հետ ջերմ հարաբերությունների մասին, ինչին անդրադարձել էր yerkir.am-ը: