Դերասան Սերգեյ Գրիգորյանին պատճառվել է միջին ծանրության վնասվածք

Դերասան Սերգեյ Գրիգորյանին պատճառվել է միջին ծանրության վնասվածք՝  առողջության տևական քայքայումով: Այսպիսի եզրակացության է հանգել դատաբժիշկը`  դերասանի նկատմամբ նշանակված դատաբժշկական փորձաքննության արդյունքում: 

Հիշեցնենք, որ 2012 թվականի դեկտեմբերի սկզբներին տեղեկություններ տարածվեցին, թե ԱԺ պատգամավոր Մհեր Սեդրակյանին պատկանող բենզալցակայանի տարածքում դերասանը դաժան ծեծի է ենթարկվել եւ ծանր մարմնական վնասվածքներով տեղափոխվել է հիվանդանոց: Թեեւ դերասանի մայրը մամուլով հերքել էր  Մ.Սեդրակյանի ենթակաների կողմից իր որդուն ծեծելու հանգամանքը, այդուհանդերձ, դերասանի հիվանդանոց տեղափոխվելու մասին լուրերը հաստատվեցին:  Դերասանի նկատմամբ նշանակվեց դատաբժշկական փորձաքննություն: 

«Փաստինֆո»-ի տեղեկություններով`, ոստիկանությունը եզրակացությունը ստացել է շուրջ 1 ամիս առաջ` դեկտեմբերի 17-ին: Ըստ այդմ`  Ս.Գրիգորյանը ստացել է գլխուղեղի թեթև  աստիճանի  սալջարդ, երկկողմանի կոնվեքսիտալ հիդրոմա՝ առանց գլխուղեղի ճնշման, տրավմատիկ նեյրոսենսոր ծանրալսության ձևով: Պատճառված վնասվածքի եղանակի մասին դատաբժիշկը  ոչինչ չի ասել, սակայն նշել է, որ հավանաբար այն հասցվել է բութ, կոշտ  առարկայով:

Ոստիկանությունում բացատրություններ են տվել նաեւ տուժողը եւ նրա մայրը: Դերասանը շարունակել է պնդել, որ  վնասվածքը ստացել է նոյեմբերի 29-ին` իրենց տանը ներքին հարդարման աշխատանքներ կատարելու ժամանակ` փայտյա աստիճանից վայր ընկնելու հետևանքով, բայց Երևանի թիվ 1 համալսարանական հիվանդանոց բուժօգնության է դիմել միայն դեկտեմբերի 1-ին:  Դերասանը հերքել է  ԶԼՄ-ների հաղորդումները, թե ինքը վնասվածքը ստացել է ՀՀ Ազգային ժողովի պատգամավոր Մհեր Սեդրակյանին պատկանող բենզալցակայանի տարածքում դաժան ծեծի ենթարկվելու պատճառով: ‹‹Այդ ամենը զրպարտություն է և չի համապատասխանում իրականությանը››,- հայտարարել է նա՝  հերքելով նաև, որ վնասվածքը կարող է ստացած լինել վթարի, հրելու կամ աստիճանից վայր գցելու հետևանքով:

Այդուհանդերձ, Արմավիրի մարզի դատախազությունը հանձնարարել է ոստիկանությանը քննության առարկա դարձնել նաեւ մամուլի հրապարակումները եւ ստուգել մամուլում նշված հանգամանքները: