Շաբաթ օրը թեժ է լինելու

Շաբաթ օրը կայանալու է միանգամից երեք կուսակցության համագումար` ՀՀՇ-ի, ՕԵԿ-ի եւ «Ժառանգության»: Արդեն տեղեկացրել ենք, որ ՕԵԿ համագումարին կուսակցություններից հրավիրված է միայն ՀՀԿ-ն:

Այդ օրը ՕԵԿ-ը պաշտոնապես հայտարարելու է, որ 2013թ. նախագահական ընտրություններում սատարելու է Սերժ Սարգսյանի թեկնածությանը:

Ի տարբերություն ՕԵԿ-ի, որը նախընտրել է, որ Սերժ Սարգսյանին արվելիք «սիրո խոստովանությանը» ոչ ոք ներկա չլինի, «Ժառանգության» համագումարը բաց է լինելու: Պաշտոնական հրավեր որեւէ կուսակցության չի արվել: «Ժառանգությունն» այդ օրը պաշտոնապես առաջադրելու է Րաֆֆի Հովհաննիսյանի թեկնածությունը:

Նախագահական ընտրություններում ՀԱԿ-ի մասնակցության ձեւաչափի վերաբերյալ, ամենայն հավանականությամբ, հայտարարություն կամ գոնե ակնարկ կարվի ՀՀՇ համագումարում: Համագումարին ներկա է լինելու առաջին նախագահ Լեւոն Տեր-Պետրոսյանը: ՀՀՇ համագումարին հրավիրված են ՀԱԿ-ին մաս կազմող բոլոր կուսակցությունները, ինչպես նաեւ ԲՀԿ-ն, ՀՅԴ-ն եւ «Ժառանգությունը»: