Ամաչեցի խնդրել` լուսանկարվել Ազնավուրի հետ. Արոնյան

Օլիմպիական եռակի չեմպիոն Լևոն Արոնյանը Պեկինում կայացած համաշխարհային մտավոր խաղերի ծրագրով կույր շախմատի մրցաշարում տոնած հաղթանակից հետո  ներկայացրել է իր տպավորությունները, մասնավորապես` ասել է, որ Պեկինում առաջին օրերը դժվար էին, հարմարվելու խնդիր կար, քանի որ նոր էր ժամանել Լոնդոնից, սակայն հաջողվեց մարզավիճակ ձեռք բերել և հաղթել իր սիրելի ծրագրում՝ կույր շախմատի մրցաշարում:

«Պեկինում ինձ անակնկալ էր սպասվում. շնորհավորանք  Չինաստանում Հայաստանի դեսպան Արմեն Սարգսյանից և հրավեր դեսպանատուն, որտեղ էլ լինելու էր Շառլ Ազնավուրը: Ազնավուրը սուրբ է յուրաքանչյուր հայի համար: Նրա հետ հանդիպումը մեծ իրադարձություն էր ինձ համար: Ես ամաչեցի խնդրել նրան միասին լուսանկարվել, սակայն ինչ-որ մեկը լուսանկարեց բոլորիս: Այնպես որ` ես ապացույց ունեմ: Հիանալի երեկո անցկացրի: Հաջորդ քայլս Ֆիլիպիններում Նոր տարին դիմավորելն է: Բոլորին մաղթում եմ ուրախ Նոր տարի»,- Facebook-ի իր էջում գրել է հայ գրոսմայստերը: