Այս տարի Ադրբեջանը 95 զինծառայող է կորցրել

Ռազմական լրագրողական հետազոտությունների «Դոկտրինա» կենտրոնի իրականացրած մոնիտորինգի համաձայն` այս տարի Ադրբեջանի անվտանգության եւ պաշտպանության ոլորտում մարդկային կորուստները 95-ն են. տեղեկացնում է SalamNews-ը:

Հետազոտության համաձայն` 88 մարդ վիրավորվել է: Մարտերում զոհվել է 15 զինծառայող, 3-ը մահացել են ականի պայթյունից, 1-ը` ռազմական գործողության ժամանակ, 76 մարդ` ոչ մարտական պայմաններում. 8 մարդ զոհվել է դժբախտ պատահարի հետեւանքով (թունավորվել շմոլ գազից, էլեկտրահարվել, խեղդվել ջրում, ընկել բարձրությունից), 16-ը` ավտոպատահարի հետեւանքով, 1-ը` անհայտ պատճառներով, 8-ը` անզգուշութկան պատճառով, 11-ը` ոչ կանոնակարգային գործողությունների, 13-ը հիվանդությունների հետեւանքով: 19 մարդ ինքնասպան է եղել:

Զոհվածներից 82-ը եղել են պաշտպանության նախարարության զինծառայողներ, 6-ը` պետական սահմանապահ ծառայության, 4-ը ` ներքին զորքերի, 2-ը ` ազգային անվտանգության նախարարության, 1-ը` զինվորական ծառայության զորակոչելու եւ մոբիլիզացնելու պետական ծառայության: