Դվին` հայկական մայրաքաղաք Եվրոպայի եւ Ասիայի միջեւ

Նոյեմբերի 8-ին Հռոմի քաղաքապետարանի «Մետաքսի ճանապարհներ» նախագծի շրջանակներում` Բրասկի թանգարանում, տեղի է ունեցել «Դվին` հայկական մայրաքաղաք Եվրոպայի եւ Ասիայի միջեւ» ցուցահանդեսի բացման պաշտոնական արարողությունը, որն իրականացրել են Հռոմի քաղաքապետարանի մշակութային ժառանգության գլխավոր վարչության պետ Ումբերտո Բրոկոլին եւ Իտալիայում ՀՀ դեսպան Ռուբեն Կարապետյանը:

Միջոցառմանը ներկա են եղել Իտալիայի խորհրդարանի պատգամավորներ, երկրում հավատարմագրված օտարերկրյա դիվանագետներ, մշակույթի եւ արվեստի, հայ համայնքի ներկայացուցիչներ. տեղեկացնում է ՀՀ ԱԳՆ մամուլի եւ հասարակայնության հետ կապերի վարչությունը:

Իր ելույթում Ումբերտո Բրոկոլին նշել է, որ «Հռոմի համար պատիվ է ներկայացնել հայկական հարուստ ժառանգության մի կարեւոր մասնիկ, որը սերտորեն շաղկապված է հռոմեացիների հետ»:

Թանգարանի երեք ցուցասրահներում ներկայացված են Դվինի հարուստ պատմամշակութային` ճարտարապետական, տնտեսական եւ հոգեւոր արժեքները: Դրանք այցելուներին պատկերացում են տալիս ոչ միայն Դվինի, այլ Հայաստանի մեկ այլ` արվեստների եւ մշակույթի հռչակավոր պատմական մայրաքաղաք Անիի մասին:

Ցուցահանդեսը գործելու է մինչեւ 2012թ. հունվարի 29-ը: