100 մեքենա մերկասառույցի պատճառով մնացել է ճանապարհին

Այսօր` ժամը 18.15-ին, Արագածոտնի մարզի Գեղարոտ-Ծիլքար և դեպի Լոռու մարզի Ջրաշեն գյուղ տանող ավտոճանապարհին ձյան և մերկասառույցի պատճառով մնացել է մոտ 100 մեքենա:

ԱԻՆ փրկարար ծառայությունից տեղեկացնում են, որ  ճանապարհի մաքրման և ավտոմեքենաները խցանումից դուրս բերելու աշխատանքներում ներգրավվել են Լոռու մարզի «Սպիտակի ճանապարհ» ՓԲԸ-ի, Արագածոտնի «Հովհաննես Մարտիրոսյան» ՍՊԸ-ի, մարզային ոստիկանության ուժերը և Արագածի հրշեջ-փրկարարական ջոկատից մեկ մարտական հաշվարկ:

Ժամը 19.50-ի դրությամբ ճանապարհը բաց է. խցանման մեջ մեքենա չկա:

Արագածոտնի մարզի Ապարան-Ալագյազ ավտոճանապարհի 2-րդ կմ-ին մերկասառույցի պատճառով մնացել են մոտ 20-30 մեքենաներ: Ժամը 20.40-ի դրությամբ ճանապարհը բացվել է: Ճանապարհի մաքրման աշխատանքներին մասնակցել է Ապարանի ՃՇՇ-ն: