Ինչո՞վ էր Ալիկ Սարգսյանն ավելի քիչ վստահելի, քան Վովա Գասպարյանը

ԱԺ խոսնակ Հովիկ Աբրահամյանի եւ նախագահի աշխատակազմի ղեկավար Միքայել Մինասյանի հրաժարականների մեջ, քաղաքագետ Երվանդ Բոզոյանի կարծիքով, որոշակի մութ պատմություն կա, «որովհետեւ ընտրություններից վեց ամիս առաջ ոչ ոք չի հայտարարում, որ գնում է շտաբի պետ, մյուսն էլ չի հայտարարում, որ գնում է շտաբի պետի տեղակալ»:

«Ես համոզված եմ, որ հասարակությունից ինչ-որ բան թաքցնում են, եւ մոտ ժամանակներս մենք կհասկանանք, թե ինչի մասին է խոսքը»,- yerkir.am-ի թղթակցի հետ զրույցում նշեց քաղաքագետը` հիշեցնելով, որ նախորդ ընտրություններից առաջ ոչ մի պաշտոնյա իր պաշտոնից չի ազատվել` նախընտրական շտաբի պետ կամ տեղակալ լինելու համար:

Մեր հարցին` ի՞նչ խնդիր պետք է լուծի Մ. Մինասյանը շտաբում` գուցե Հովիկ Աբրահամյանին վերահսկելո՞ւ, Երվանդ Բոզոյանը տարակուսեց, որ գուցե իսկապես Հովիկ Աբրահամյանն այնքան էլ վստահելի չէ գործող նախագահի համար, բայց այս դեպքում հարց է ծագում, թե ո՞ր պաշտոնյան է վստահելի:

«Այն տնտեսական քաղաքականությունը, որ վարվում է Հայաստանում եւ այն դժգոհության պարագայում, որ կա, շատ դժվար է ասել, թե ինչ է նշանակում վստահելի պաշտոնյա: Ի վերջո, ցանկացած պաշտոնյա կատարող ֆիգուր է, ինքը ի՞նչ պետք է անի` ինչ-որ դավադրությո՞ւն պետք է անի, պետք է վա՞տ աշխատի, սխա՞լ աշխատի»,- նշեց քաղաքագետը` հավելելով, որ վստահության խնդիր կարող է առաջ գալ ընտրությունների ժամանակ, իսկ այս պարագայում ոչ ոք չի կարող ասել, թե որ պաշտոնյան ավելի վստահելի կլինի նախագահի համար, իսկ որ պաշտոնյան` ոչ:

«Դրանք դատարկ խոսակցություններ են, բամբասանքի առարկա եւ որեւէ քաղաքական նյութ չեն պարունակում իրենց մեջ: Ինչո՞վ էր, ասենք, Ալիկ Սարգսյանն ավելի քիչ վստահելի, քան Վովա Գասպարյանը. այդ հարցի պատասխանը չկա, քանի որ նրա հրաժարականը քաղաքական բնույթ չի կրել, այսինքն` Ալիկ Սարգսյանը չի հայտարարել, որ ինքն ինչ-ինչ հարցերով համաձայն չէ գործող նախագահի հետ: Այստեղ վստահության կամ չվստահության հարց չկա, այստեղ ուրիշ խաղեր են»,- նշեց Ե. Բոզոյանը` հավելելով, որ այդ դավադրությունների սցենարները` իբր հանում են Քոչարյանի թիմին, հանում են ռուսամետ ուժերին, լուրջ չի համարում: