Կոնյակի եւ գինու հետ արտահանվում է հազարամյակների պատմություն ունեցող մշակույթ

Պռոշյանի կոնյակի գործարանն ավարտել է մթերման գործընթացը:

Ինչպես yerkir.am-ին տեղեկացրին ընկերության մամլո ծառայությունից, այս տարի ընկերությունը մթերել է 18.5 հազար տոննա խաղող եւ 6 000 տոննա այլ գյուղմթերք:

«Մթերման գործընթացն ընկերությունն ավարտել է առանց պարտքերի` կատարելով բոլոր ֆինանսական պարտավորությունները»,- հայտնեցին ընկերությունից` միաժամանակ հիշեցնելով, որ  թեեւ գյուղատնտեսական տարին բարենպաստ չի եղել` ցրտահարություն, կարկուտ եւ այլն, այնուամենայնիվ, ընկերությունը մթերման գործընթացում աշխատել է 2000 գյուղացիական տնտեսությունների հետ:

Արտադրական ծավալների ավելացումը, ըստ ընկերության, պայմանավորված է ինչպես տեղական շուկայում ընկերության արտադրանքի նկատմամբ աճող մեծ պահանջարկով, այնպես էլ արտասահմանյան շուկայում հայկական կոնյակի նկատմամբ մեծ հետաքրքրությամբ:

«Մենք մեծ պատասխանատվությամբ ենք կատարում մեր գործը` հասկանալով, որ որոշակի առումով կոնյակի եւ գինու հետ արտահանում ենք նաեւ կոնյակի եւ գինեգործության հազարամյակների պատմություն ունեցող մշակույթ»,- ասում է ընկերության տնօրեն Արմեն Գասպարյանը: