Օծվել է Սրբոց Հրեշտակապետաց եկեղեցին

Նոյեմբերի 5-ին Մայր Աթոռ Սբ Էջմիածնում Ս. Հրեշտակապետաց տոնինմ Գարեգին Բ կաթողիկոսի հանդիսապետությամբ, տեղի է ունեցել Սրբոց Հրեշտակապետաց եկեղեցու օծման արարողությունը:

Մայր Աթոռի մամլո դիվանից yerkir.am-ին հայտնեցին, որ եկեղեցու հիմնարկեքը կատարվել է դեռեւս 2007 թ.-ի սեպտեմբերի 10-ին, 2011թ. օգոստոսի 23-ին օծվել են եկեղեցու խաչերը, իսկ եկեղեցու նավակատիքը կատարվել էր նոյեմբերի 4-ի երեկոյան:

Արարողությանը մասնակցել են Հայ եկեղեցու թեմակալ առաջնորդները եւ թեմական պատվիրակները, Մայր Աթոռի բարերարները, Մայր Աթոռի միաբանները եւ Գեւորգյան հոգեւոր ճեմարանի ուսանողները:

Գեւորգյան հոգեւոր ճեմարանի հարեւանությամբ կառուցված Սրբոց Հրեշտակապետաց եկեղեցու բարերարն է «Հորիզոն 95» շինարարական ընկերության տնօրեն Գագիկ Գալստյանը, նախագծողը` անվանի ճարտարապետ Ջիմ Թորոսյանը:

Եկեղեցու օծումը կատարել են Ամենայն Հայոց կաթողիկոս Գարեգին Բ-ն, ԱՄՆ Հայոց Արեւմտյան թեմի առաջնորդ Տ. Հովնան արքեպիսկոպոս Տերտերյանը եւ Դամասկոսի հայոց թեմի առաջնորդ Տ. Արմաշ եպիսկոպոս Նալբանդյանը:

Օծումից հետո եկեղեցու բարերար Գագիկ Գալստյանին շնորհվել է Հայ Առաքելական Սուրբ Եկեղեցու պատվո բարձրագույն` «Սուրբ Գրիգոր Լուսավորիչ» շքանշանը: